سلام عليكم
قصيده للشاعر الشعبي المبدع عبد الحسين الحلفي
( هلي بيه درو )
هلي بيه درو كمت ان احبك
ودرو بس انته تلفتلي انتباهي
وهلي نشدوني عنك كلت بالروح
ونشدوني اعلى روحي وكلت ماهي
وهلي يعرفوني من تتزاعل وياي
اضل اصرخ رحمتك يا الهي
وانته هواي متغير هالايام
والبراسك حجو اني اعرفتهم
نفسهم همه اجو واتقربولي
ودكوا باب كلبي واطردتهم
لان تقديرك انته فوك عالراس
احطهم وين انه لو قدرتهم
انته ما تجي بس انه اشوفك
همه شكد اجو بس ما شفتهم
لجل حالك اني بهذلت حالي
وحالي يكول يلا المهم حالك
ودلالك زاد زيدلي اذيتي
واذيتي اجماله هم تحب دلالك
ويمنتي جاهزه لشبكه يمنتك
وشمالي خدرت وتنطر اشمالك
اذا انته دكول مو من حقي اصد ليك
خيالك حلو نصد لخيالك
يشابع نوم والله قرايه قاريك
ومدري اشمالني وادري اشمالك
كالولك كبل عنديي علاقات
وغيرك انه عاشك هواي اسامي
اعشكت غيرك نعم بس تدري اشلون
اعشكتهم مو صدك وانه باحلامي
وانه عندي قصد حبيت غيرك
حتى امتلك خبره في غرامي
صار اسنين احضر واقره لهواك
وصار اسنين احضر في كلامي
لان ميصير احبك مثل غيرك
وانه الضامك لاخر ايامي
وانه الحبيتهم جانو بروفات
حتى تضل انته مسك لختامي
احب شنو بيك واكره كلشي مو بيك
لذالك كمت احبك عامي شامي
ومو بس برضاك اتولعت بيك
بخصامك حيل متولع خصامي
شسولف عن محبتي ما تصدك
انه بنفسي ما مصدك محبتي
اجه سيفك علي وخرت عنه
ما قبلت علي زعلت ركبتي
يشابع نوم ما كالولك اشصار
بغيابك ايدي ما رحمت بكصتي
يشابع نوم انا شابع بجي اعليك
وما همني البجي ودمعتي وعبرتي
انه خايف لان انته بهالعيون
واخاف من ابجي تنزل وي دمعتي
ومن يا ناحيه تريد اني انساك
اموت اعليك من كل النواحي
تتوسل جراحي بلجمه منك
ومن غيرك دوه وترفض جراحي
حسرتي اعليك ريح اتشلع الاشجار
وكذلتك تكدر توكف رياحي
يشابع نوم ما جيتك بالاحلام
انه ما انام واحلم بيك صاحي
يشابع نوم ما فزيت عالصوت
كبور البالنجف سمعت صياحي
بصفاحي بقه بس اثر سهمك
ولان سهمك طلع اصفك براحي
واثر سهمك لان بس بالصفحتين
السلم من جسمي ضل يحسد اصفاحي
عليك اطوطحت صاحي مو سكران
وانه اول محب سكران صاحي
دوام اهل المدارس وكت واحد
ودوامك بالكلب عصري وصباحي